Թանգարանի հարակից տարածքում է գտնվում Հայ և էստոն ժողովուրդների բարեկամության աղբյուր-հուշարձանը։ Այն տեղադրվել է 1964 թվականին: Հայկական տուֆից պատրաստված, 4.5 մետր բարձրությամբ, դեմ հանդիման կանգնած երկու հուշաքարերի վրա պատկերված են հայ և էստոն ժողովուրդների դուստրերը: Հայաստանի ծիծեռնակը այցի է գալիս էստոնուհուն, էստոնական ճայը՝ հայուհուն: Հայ աղջիկը մատուցում է խաղող, իսկ էստոնուհին ժպիտով նայում է հայուհուն: Աղբյուր-հուշարձանի վրա փորագրված է «Այս աղբյուրի պես և Արարատի նման, թող հավերժ լինի հայ և էստոն ժողովուրդների բարեկամությունը, որի սկզբնավորողը անմահ Աբովյանն է»: Ուշադրության են արժանի պատերի նիստերից դուրս եկող կողաքարերը, որոնց միջից տարիներ առաջ ջուր էր հոսում «առվակ-կամուրջի» մեջ։
Քանդակագործ Արա Հարությունյան։
