ԽՍՀՄ ժողովրդական ճարտարապետ Ռաֆայել Իսրայելյանի պատվին մայրաքաղաքում հուշարձան տեղադրելու նպատակով ՀՀ քաղաքաշինության կոմիտեում տեղի է ունեցել քննարկում: Քաղաքաշինության կոմիտեի նախագահի պարտականությունները կատարող Արմեն Ղուլարյանը, Քաղաքաշինության կոմիտեի նախագահի տեղակալ Նունե Պետրոսյանը, ՀՀ Վաստակավոր Ճարտարապետ Սաշուր Քալաշյանը լսել են Ճարտարապետներ Հայկ Ասատրյանի, Արեգ Ասրաբյանի, Ռաֆայել Իսրայելյանի ընտանիքի ներկայացուցիչ, Իսրայելյանի թոռան՝ Արամ Ղանալանյանի առաջարկությունները և կիսվել մասնագիտական կարծիքներով։ Ճարտարապետներ Հայկ Ասատրյանն ու Արեգ Ասրաբյանը Վարպետի հիշատակը հավերժացնող երկու նախագիծ են ներկայացրել։
Հիշեցնենք, որ Սարյան 7 հասցեում՝ Իսրայելյանի տունը, որը կառուցվել էր նրա իսկ ձեռքով, և ուր նա բնակվել է 1938-1973թթ.-ին, ցավոք 2011թ.-ին քանդվեց։ Դա մեծ կորուստ էր, ուստի Ճարտարապետ Հայկ Ասատրյանն առաջարկում է տուֆե հուշաքարի տարբերակ, որով կհավերժանա այդ վայրում ճարտարապետի ապրելու և ստեղծագործելու փաստը։ Ճարտարապետ Արեգ Ասրաբյանն իր ներկայացրած տարբերակով առաջարկել է բազալտե հուշակոթող կանգնեցնել Սայաթ Նովա 14 հասցեում բնակելի տան դիմաց` հիմք ընդունելով Ռաֆայել Իսրայելյանի մեծ ոգևորությունը և սերը դեպի Մեծ Աշուղը, և նրա անունը կրող փողոցը։ Երկու նախագծերն էլ իրենց կատարումով հոգեհարազատ էին Մեծ Վարպետի ձեռագրին և ոճին։
Հարկ է նշել, որ և՛ Հայկ Ասատրյանը, և՛ Արեգ Ասրաբյանը վերոնշյալ առաջարկները կատարել են՝ Մեծ Ճարտարապետի հիշատակին հարգանքի տուրք մատուցելու մղումով և անհատույց։
Ներկաները միանշանակ ողջունեցին ճարտարապետների նվիրական նախաձեռնությունը։ Արամ Ղանալանյանը Իսրայելյան ընտանիքի անունից երախտիքի խոսք հայտնեց և երկու գաղափարների իրականացմանն էլ հավանություն տվեց։
Երևանի քաղաքապետարանի և ճարտարապետական հանրության մասնակցությամբ քննարկումներ կազմակերպելու նպատակով առաջարկվեց ներկայացնել կոթողների տեղադրման գրաֆիկական մանրամասներ և ֆինանսական հիմնավորումներ։
