Հաղթանակի զբոսայգու մուտքը համալիրի վերջին իրականացված կառույցն է` կատարված 1982 թվականին: Կառուցումը կատարվել է Արեգ Իսրայելյանի ղեկավարությամբ Ռաֆայել Իսրայելյանի նախագծով, նրա մահվանից հետո: Ունի կենտրոնական սիմետրիկ առանցք, ինչպես Իսրայելյանի մյուս աշխատանքներում, ամեն հարթաքանդակը յուրահատուկ է և չի կրկնվում: Ձախ կողմում առյուծ է քանդակված, աջում՝ վիշապ, կենտրոնական մասում՝ արևի մեջ թուր: Ետևի կողմից հարթաքանդակները նույնպես չեն կրկնվում: Աջ և ձախ կողմերում կարելի է տեսնել արծվանման առասպելական թռչուններ:
